NEI LEH LAM HAUSAKNA HI ZATAM ADIN MALZAWLNA ZOTUI THIANG GUAL A AHI
– KL Muana Khaute
VANTANG thu gen in, sana-dangka thangai hi sualtin bul ahi aki ti sek ah. Zia chu mi TANGPI te’n thutak dan in I pawm mai sek ua, zia ngaidan leh PAWMDAN hi nguntak ah ngaitua ahi chun a dikpen ahilo dan hiat thei ahi. Sum leh pai umlo ahin khawvel na leh Pathian lalgam na septhei ahi puai ti I hechiat ui. Zia chungchang ahin khawtang leh mimal khanglui kiziltil dan hi ngaitua thak ah sum leh pai hausak di dan ngaitua thak pha ding in ka gel hi. Ahivang in, sum leh pai hawldan leh a mat di dan guanggal thiam chu ngai di ahi. Sum leh pai neilo chun khawvel ahin bangma sep thei ahi puai.
Sum leh pai nei gamte chun khawvel pumpi thunei leh vaihawmna a changsek un, I Bible in a neilote chu lak piak hin tin uh, a haute chu piak be in um di ahiu ati gualma’n khawvel ah sum leh dangka neite’n khawvel ah thuneina a nei un gentheite le a panpi thei sek ui. Chutichu ahitak ahileh sana-dangka neitam hi thilpha leh malzawlna changte ti na ahiu a, Pathian lungtuak ahiu a malzawl ah um hi mai ahiu.
Khawvel sana-dangka hau hi sual ahi pua’n, a mangtute leh a kemtute’n a matna diktak ah mat ahichun mihiam le a kipak a, siamtu le kipak ngei di ahi. Hausakna leh pilna hi Pathian piak ahin ama dawidan ah I mat chun mi dangte a ding ah kipakna leh khantona ahi.
Khawvel leh a sung ah thil um zosia hi khawvel cheimawi tu di leh ama zem hawitu ding ah siam ahin, ahidi gual tak ah mat ahi chun Pathian lopina ahi. Amabo, a chentu mihiamte’n siamtu dawnglo ah ama mimal nawp dan ah a mat phat tak leh sual ahung hita sek ahi.
Insung chatgana leh taksapna hin mihiam lungthim ala gilo ah, a mihing hinna thilpha um chule a bawlthei ngaisek puau. Abang hitaleh, leng Solomon in a mipite a puihuai zawna ding ah pilna bep a dawtlai in, pilna bep ah vaihawm zolo di ahiziak in hausakna leh a pawimaw chuam chuam a piakbe nalai hi. Mipi na, gam leh gua nasepna ding leh Pathian lagam na sepna ding in sum leh pai ngainat leh hawl chu mihiamte sep leh bawl di him ahi. Amabo, I sep leh I bawl, I hawl sana-dangka hin ei thunun di ahi pua’n, eima kithunun di ahi achutilo chun thilpha sep sang in sual na sem ding in ei pui zaw sek ahi. Zia ziak achun, sana-dangka Pathian apat muthei chu gua’n lah chuleh panpi ngaite panpi inla khawvel cheimawi tu’n pang chiat guai tiu in, siamtu Pathian lopi tak in chawisan in um ta hen.
Khaile, Pathian in a siam, chung leh nuai thil um zosia hi ama cheimawi tu di leh lopina ding ah siam ahiziak in Eden hivei zosia sawpthiang ah a chapa thisan ah sawpthian zuitu leh pawmtu te’n leithak leh vanthak khawsa I hitak ziak un thilsiam zosia tawh ama chawihawi thei chiat ding in zawna leh pilna ei pia ta hen.
