CHRISTMAS THIL PIAK CHINI
– K.L.Muana Khaute
Pathian in khawvel leh a sung ah thil um zosia a siam ah, tichun a en a, pha asa ma ma hi. Ahinla, a en nawn ah, ziachun bukimlo deu in ahe ta, tichun, a enkawltu ding mihiam ama kibatpi siam a hun gaw ta, Adam a siamtai. Amabo, Adam bep chu a pangvawt ding ahiziak in, Evi a pasal tuamlumtu di leh suan leh pak neipi ding in Adam ipsak in a nakgu la dawk in numei chu a siam in, a umkhawm sakta’n, damsung lamsuk lamto mangkhawm a suan leh pak hingkhawm a, thilsiamte enkawl ding in thuthung a siampi ta ahi.
Thuthung khautak a thunpi nung in, numei chu thepthak in a hung um masa ta, tichun Adam chule zia dan achun a ki-awk ta, banggual suanlam siam maleh Pathian ma thiam a changzo ta puai. Eden huan nawptak mun apat hepina mak in Belam vun ah tuam in nawdawk in a um tai. Damlai lamsuk leh lamto chu khawsa-ul leh thisan seng in hinkhua a hung mang tau ahi. Zia ni apat chun, mihiam leh khawvel tandawk tu ding chu a pawimaw ta ahi.
Hun bang ahem sung chu gan thisan ah kithawi in Pathian ngaidamna chu dawn in ngaidam ala hi sek ui. Himaleh, zia Pathian kumtuang lemguat chu bukim zolo hidi ahia a mi thiangtho zawlnei Isai leh a dangte mang in khawvel hukdampa hung pian di thu chu ala genlawk ta ahi. Zia thupuan hi a hung um phat in mithiam michingte a ging lawk un, amabo, khawvel Leng leh Lalte chu ling leh lau in huaisia tak ah vaidawn a gua maleu Pathian lemgelna chu mihiamte matphak gual ahilo ziak in khua tawmtak Bethlehem bawng-in ah a hung piang ta ahi.
Zia gual bawk a chu tulai mihiamte, a diak in Khristian te’n I Lalpau Jesu pianni mang ding ah I kisaklawk danteu hi ngaitua kham ting in ka hiai. I Lalpau Jesu pian ding ah Leng leh Lalte’n ala ngak khel uh kha hezing kawm a, Christmas hi tawm tak leh daltute gawtna tuak thei zing ihi lam ki hezing a chrismas mang ding ah mansa I um uh ka dawi ma ma hi.
Khawvel hukdam di pa hung pian akhan miching te’n thilpiak kipaktak Aksi vak zui a nausen chu gimtui piak a chibai buk kha ahi. Ahinla, langkhat lam a muakguate khan nausen huaisia tak a chibai buk di a tiu ahi. Zia gual ma chu tulai khristian tamtak te’n nunnawp gualvakna te, nei leh lam ki-suklatnate ah kimang zo phial ta ahi. Nausen chu eima sunggil a pian sak chiatI lei damsung ah Pathian a ding ah hinpi ding, gawtna le Ama zal ah I hinna lan ngam chiat din Lalpa’n zawna ei pia ta hen. Amen.
