PATHIAN IN A THIT-CHIL ISRAEL SEPAI ZATHUM TE LEH ZOGAM SAPHA TE ( Judges 7:1-25)
-K L Muana Khaute.
Gideon in Israel melma te a do ding a hin Isreal nam te’n Leng neinailo a hiu thu i Bible in ki chian tak in hiat thei le muthei a hi, chun Joshua thinung tiang a hin le hin Israel ten Leng neilo a hiu, zia thugosia chu Thiampu te mang in Pathian chu a Leng uh a hi. Samuel lekhabu 1100 BC vel tuam ah zik hi dinga a gingchat a hi. Israel te hi sa leh gal hau a hi ziak un, Pathian in a hun hun a ding in, Israel mipi te enkawl ding in vaihawm tu ding a guat piak sek ah, zia ziak a chun a lekhabu ngei hi le Judges( vaihawm) te hun ki ti hi ding a hi.
Leng neilo a hi ziak a hi diam aginnau a chang basam in, Pathian a ki heimang san sek ua, Milim siamkawm ang in a bawk khup sek uh a hi. Isreal te’n Pathian a kinung hei san tak uale, Pathian in gâlte khut in, sal-in a bawl khial nau a kihiat daw masang sia uh chu melma te khut in a piadawk sek uh a hi. A hin Lalpa kianglam a ngat tak uale Zallenna a mu sek uh a hi. A hin puitu kituplo a nei khak ziak sek uh a hi diam? Amau nawpna lam chiat in a pet mang sek uh a hi, himaleh Pathian in ama nam telte a hi ziak un puitu pha aguat piak zel sek a hi, Amabo achang leh puitu bei leh enkawl di umlo in aum sek ui, Pathian in ahepi na thalim nuai a kawi in, a gual lel chang nei sek maleu a hepi khut in a kai bat in aum pi zing sek uh a hi.
Amitel te leh angainat ma ma Namte te a hi ziak un, Puitu pha Pathian in a pia zel sek a hi, hunkhat a chun Isreal nam enkawl tu ding hotu pha, gin-um Gideon le a guanpiak a hi(Judges 7:1-16) Isreal te’n Gideon hun lai a chun galte sat dinga a kisin sak lai ua chun!
Jerubbaal (zia chu Gideon ahi) chu a kiang ah sepai um zosia chu tawh, jingkâl matak ah tho in, Harod Tuinak ah chun a kikul ta’u a; Midiante giabuk chu ama’u umna kipat mallam pang ah Moreh tang nuai, phaijawl ah um ahi. LALPA’n Gideon kiang in, “A khut ua Midiante ka piak dingin la kiang ah sepai umte chu a tam taluau hi. Israelte chun, ‘Ka khut ua kihukdok ka hiu,’ kiti kha’n au.
Tu’hin, sepaite kiang ah gen in, ‘Kuale a lau leh kithing taphot chu chia kit ziang hen,’ ti’n la,” a tia. Tichun, Gideon in a zendok ah; sepai sing ni leh sang ni a kile’kit ua, sing khat a um den ta’u a.
Ziaphatchun, LALPA’n Gideon kiang in, “Sepaite chu a tam talua na lai ui; lui ah pui suk inla, hun khendan piak ing ka; ‘Zia hin hun zui hen,’ ka tite chun hun zui uh hen la; ‘Zia hin hun zui ki’hen,’ ka tite chun hun zuida ziang uh hen,” a tia. Tichun, sepaite chu luidung in a pui suk ah; chuleh, LALPA’n Gideon kiang in, “Uicha tuidawn gual ah liak thaw taphot langkhat lam ah koichuam inla; khupdin ah, a khut ua tui luak ah dawnte cheng chu a langkhat lam ah koichuam kit in,” a hun ti’n.
A khut ah tui luak ah dawnte chu za thum a hiu ah; a dang cheng chu a dang cheng chu khupdin ah chip thaw ngen a hiu a.
Ziaphatchun, LALPA’n Gideon kiang in, “A khut a tui luak ah sawn thaw mi za thumte bep hun khenthak piak ing ka tin, ziate khut ah chun Midiante chu hun pia ding ka hi. A dang cheng chu kile’kit ta’u hen,” a tia. Sepaite khut ah kipat bel leh pêngkulte chu a lakpiak ah; a dang Israelte sia chu, ama’u giabuk lam chiat in a chia kit ta’u ah; mi zathumte bep chu a um den ta’u hi. Midiante giamun chu a nuai tak ua, phaijawl ah um ahi. Zia jan ah chun Lalpa’n Gideon kiang in, “Tho inla, a giamun ua va bulu in; la khut ah ka piaksa a hita ngal a.
Nang ngen ah a giamun uh bulu ding chu la lau leh, la suakpa Purah kha taw chia suk un;
chutileh, a kihonau hethei in la tin, zia zaw chuleh, a giabuk uh va sim ngam ta dingin la khut hihat in um ta’n ah,” a tia. Tichun, a suakpa Purah chu tawh kitawn in, a melmate’u giamun vengte lak ah ama’u hun naipente umna tiang chu a va chia suk ta’u a.
Midiante leh Amalekte, chuleh Sualam gam ah mite zosia chu zia phaijawl a chun khaubepi hon gual mai in a dim met mut ta’u a; chuleh a sangawngsaute’u tamdan chule tuisuagiat pam a piaunel gual mai ah simsen ding gual ahi pua’u a.
Gideon a tun suk phatin, mi pakhat in a lawipa kiang ah a mang a la gen ah; a kiang ah chun, “Mang khat ka nei in, ka mang ah chun Midiante giabuk ah hin barli bu ah kisiamvâithum tang khat a hung kilik lut hen, puanbukte zosia a delkhum in, a leng un a kilek khup un, a chimsuak ta mai in,” a tia.
A lawipa chun, “Zia chu bangma dang ahi puai, Israel mi Joash chapa Gideon chemjam a hi chu; Midiante leh asepaite’u zosia chu Pathian in ama’u khut ah a piakdaw a hita chu,” ti’n a dawnhu ta’n.
Gideon in mang neipa thugen leh a hilchetna a het phat in, Pathian a ho ta’n; Israelte giamun lam in a hung kit ah, a kiang un, “Tho un; Lalpa’n la khut un Midiante sepai haw chu a hun pia tai,” a tia.
A sepai zathumte chu pawl thum ah a khen zaw in, a leng un pêngkul khat leh, bel hawm sung ah thaumei um a choisak chiat a,
a kiang un, “Ei en zing unla, ka bawl gual gual in hun bawl un; a giamun kiang uh ka tun phat leh ka bawl gual gual ah la hun bawl chiat ding uh ahi.
Kei tawh ka kiang ah um zosia’n, pêngkul ka hun mut phat uh leh, nang unle a giamun tuam zo sia’u ah chun pêngkul hun mut chiat unla, ‘LALPA leh Gideon a ding in!’ ti’n la kiko chiat ding uh ahi,” ti’n a hil a.
Tichun, Gideon leh a kitonpi sepai zakhatte chu jankim galveng kithentua hun lai tak in, a giamun kiang uh a hung tung suk ta’u a; ziaphatchun, a pêngkul uh mut in, a lei bel choite’u a hun khen kek chiat ta’u a.
ziagual ma chun, pawl thum ah kisiamte chun a pêngkul uh mut chiat in, a lei belte’u a hun khen kek chiat ta’u ah; a veilam ua meisel chawi in, a changlam un a pêngkul mut ding uh a chawi chiat ua; chuleh, “Chemjam chu LALPA leh Gideon a ding,” ti’n a kiko chiat ta’u a.
Giabuk kimvel ah ama’u umna mun chiat ah kipat a hung dindaw phat un, giabuk ah umzosia chu a taijak ua; a kiko ua, a tai mang zo ta’u a.
Pêngkul za thum chu a hun mut chiat phat un, LALPA’n giabuk sung ah sepai um zosia chu ama’u leh ama’u a kisat tuasak ta’n; sepaite chu Zererah lam ah Beth-shettah leh Ta bbath lam ah Abel-meholah tiang in a taijak zo ta’u a.
Chun, Midiante delzui dingin Israelte lak ah pasal um zosia Naphtali phung ah kipat leh Asher phung ah kipat leh Manasseh phung ah kipat a kodok ta’u hi.
Chuleh, Gideon in Ephraim tanggam zosia’n thangko a sawl ah, a kiang un, “Midiante do dingin hung kuan suk unla, Jordan lui ah Beth-barah mun tiang in a la chengpang un,” a tia. Tichun, Ephraim phung ah pasal zosia kiko khawm in,Beth-barah leh Jordan lui tiang in a la man tan zo ta’u a.
Midiante sepai hotu lian Pani Oreb leh Zeeb a la man ua; Oreb chu Oreb Suangpi chung in a that ua, Zeeb chu Zeeb grepga hekna khuk in a that ua, Midiante chu a delzui pek ta’u ah. Oreb leh Zeeb luchang chu Jordan lui gal lam ah Gideon kiang in a hun paw tung ta’u.
Tigual a hin Lalpa’n a mite a la pui a hi, Pathian in Israel nam a tunding til lim lai in, Leng leh Lalte guatpiak lo male, vaihawm tu a ma dawidan le anam telte puihuai ding a guat piak sek a, Isreal te chu a thunun lo hun inle, a basap hun a ding leh beidawng hun a ding in Lalpa toh a mitel te kizawpmatna umzing thei na ding in Vaihawm tu ding leh ama toh a chate kikal chingtup ding mifel leh ginum telchuam te a a guatpiak zing a hi. Tigual ma a chun Pathian leh inampi ki zawp mat zing na ding in, Ama kanthak tak i hithei na ding in, Lalpa toh i kizawp mat na tan lo hial ah lunggual tak le ama lau le belzing leu hin, I melma lau um le nam hat-te um male, Lalpa hatna Isreal te gual in suang leu hin. Lalpa kulpi suklin gual lo gual in, a ma dinpi zing leu hin basam lo in, galte ang in mualpho lo ding i hiu. Unau kihepi ah kimuang ngam tua ah, chungnung kichu lo in, hangsang tak in Lalpa bel zing kawm in malam suan leu hin, nikhat tei chu zallenna kawlni eu uh Zo-suan te a ding inle hung suak ngei ding a hi.
