BAZAR SUNG A AUTO /TAXI SERVICES TAM TALUA.
-Editorial
Lamka Khawpi Khan to ding mizo sian dawi chiat hitiu, Ahin la apha lam akhan to na chu a dawi um diak hi. Kum 5 masang chun Bazar chia na ding in Town Bus ala um in, Auto leh Taxi mu ding ala um puai. Auto leh Taxi atam ziak a khawpi khang to deu in ki lang maleh ahun tak ah akhan lo chun, Thing agasua lo a mawk khan khan gualmai hi ding ahi.
Khua leh veng gam la te, akilkawi deu te Mani gari nei lo te ading in Auto leh Taxi um chu thil kipak um tak mai ahi. Hospital a an thak ding, Damlo ziak a kin tak adamdawi in zawt ding ti te chu hatak Auto leh Taxi um chun apan pi mama hi.Taxi leh Auto atam ah aphat chuam le khat vei holim kit ding ihiu.
Ati leh zia bailam tak ah bazaar chia thei na, kiltin a apat tai khawm thei na hung um ta ngei chu iki mu khawm nau mun Hospital, Bazar te hi athak in vak vel etkit tiam hitiu. Meitei thuching in Ngan atam athipi ti gual khan ei lawi in le Auto leh Taxi atam takluat le dan tak le I hun thipi diu in aki lang hi. Mi khat in I hin na ding in nisin a bazar leh hospital I mamaw lo mai thei, ahin,mamaw hun amat thei ding aum lo thei lo hina pi’n, tuhin ei ten nasem lo zen a hun sin a bazaar chia ding iguat uh abang tai, sum neu khat ineisun sun Auto leh Taxi services te hawp daw kang kal I ngakla hi le ki lawm , ale lam a lo bawl/Business bawl sang a Auto leh Taxi services apan ding nuam itam khaw law tau.Auto hek,Taxi hek i that nawp ten uh le, danle gam dingte suak a, khualzinmite suak a lut na bul ahi lam i hetlo ziak ahi. Gam dang ami te ei gam anasem ding a, business bawl ding a hung lut zung zung ei lawia gam nei te a Auto/Taxi driver ding mai a pang di? Khaw sung tin a Auto services atam tak ziak in Khamthei zuak na nasa tak in ahung bai lam khaw lawi. Bazar chia bailamtak luat ziak in Khamthei bawl I gam apun khalawi,a bailam zosia hin development ei tun a hi diak puai.
Tunung leh Auto leh Taxi ti beplo Train(Lenna ahek thei umleu hin le achukna ding aphual um theilo) le hung tung nalai ding ahi. Zia phat chu leh bang suak ta ding ihiu em? Mihing hung pung nalai ding Auto leh Taxi hung tam nalai ding, in kikal zosia, lam ka thuam zosia, lamzul zosia sumdawn na mun hung hi ta ding ahi. Sapte thu ching in Thikchu asat lai in sek in ti ahi gual in tua ADC ki vaihawm na nuai a town sung bek chu um ihi nak lai sam uh chun, zia te hi ahun tak a etkawl pawi maw ding ahi. Independent , Zalen gam, Zogam muleu hinle agam siamding te ei ma ihiu a, tu pat I siam lo chun dan lehung ki khel ta ding ahi.
