GINDAN DIHLOU
The Eastern Lightning Church/ The Church of Almighty GodPastor M. Thangboi Zou
*Tangtel*: _“Mihinga dinga dih leh kilawm lampi a uma, atawpna khu shina lampi ahi”_ (Thupilte14:12).
*Thumapui*: Tulai a sakhuo thu a akigen minthang na theisah leh na jasah zong ahita mai thei hi, nanleh theichet ngai mama khat ahi. Aziehpen tulai khangthate tami Thang (trap) a aw tampi itenna gam ah zong um simsimta ahiman in mawltah in ngaituo khawm lei chin ka hing kisah hi.
*I Tangtel in*, agetnuom dan khu _“Mihinga dinga dih leh kilawm lampi a uma, atawpna khu shina lampi ahi_”, tamte ngun tah a ngaituo thamching mama ahi. Tamin agennuom ahileh, _“Mihing pilna in thutah leh thudihlou, khelna leh hoina, akilawm leh kilawmlou akankhiet na dingin kibulphuna chinglou ahi. Pasian hing kilahna kammal (Bible) in, hinkhuo dih zatna ding, na lampiellouna ding a khiel theilou, kibulphuna dih ahi. Mihingte ngaituona ah shina haichi a um a, Pasian ngaituona ah tangtawn hinna hing pul khie hi”_ chite ahi hi.
Tulai in mi khen khatten China gam khu _“Khristian punna gam”_ chin ikipahpi mama ua, gam tuomtuom akipat Missionaryte nasep ziehin zong a khang mama hi, ahin atangpi a hing khang khu tunia igen ding _“The Church of Almighty God”_ kichite ahizaw uhi. I theisah ahi, China gam khu *Communist gam* ahia, nanleh China gam ah _“Bible Printing Press”_ zong aum hi. Khristian dihtah apun ma bangin Khristian dihlou (Cults) zong hing pung hat mama hi. China mediaten zong agam ua gindan dihlou zauhuoipen (Most Dangerous Cults) chin zong aphuong khie uhi. Tunin mawltah in tam _“The Eastern Lightning Church”_ kichite hing kipat khietdan, a Gindan uh, a Nasepdan/ Mission uh, Akivaihawmdan uleh Bangzieh a hichi punhat mama uh adiei? chite kikum khawm vai ei.
Tunia igen dingte khu laibu tuomtuom a kipat hing kai khawm ding kahi manin, geldan dihladeu, chingladeu leh kivat aum leh Pasian leh simtuten na hing thei siem ding un ka hing ngen masa hi.
*AHING KIPATDAN (Origin)*:
Tam Eastern Lightning Church kichi khu Kum 1991 bullam in China gam ah *Zhao Weishan* kichipan ahing phukhiet ahi hi. Ama ahileh Physic Sangsye khat ahiban a _“radical quasi-Christian”_ ah member khat zong ahi hi. Ama ban a *Jesu* achinu uh *Yang Xianbin* khu ahi hi. Tam sakhuo khu China leh leitung pumpi ah member mi 4 Million vel aum uhi, chin record akimu hi. Yang Xianbin kichinu khu amin tha (new name) din _“Lightning Deng”_ zong akichi a, China gam Henam Province ah ateng hi. Eastern Lightning adie lamkai khat maimai in a um a, a lamkai lienpen uh Zhao Weishan kichipan _“Pasien nu (Jesu)”_ chin aphuong khie hi. Agendan in Jesu/ Pasian khu ahing pieng kieta (incarnate) a, tuami khu Yang Xianbin ahi hi, chin atang koupi hi. Bang dinga tami ahing gen uh adiei? ichileh Laisiengthou *Mathiu 24: 27* na _“Suolam a tunphe ahing pheta tumlam dong asalvah dinga, Mihing Tapa hing pei kiana zong tuabangma ahi ding hi”_ tungtawn a ahing phukhiet uh ahi hi.
Apeisa 2000 kum in Zhao Weishan leh Yang Xiangbin khu US ah avapei ua, tuachin _the Church of Almighty_ khu ahing suhpiching ta uhi. *Zhao Weishan* in *_Yang Xianbin_* khu _“Christ of the last and Almighty God”_ chin ahing phuong khie a, tualeh _“Jesu hing peikiata (second coming) a, aman (Yang Xianbin) Pasian nasep bangkhai zousie ahing sem muolsuo ding hi”_ chin agen hi.
Apeisa 2002 kum in Eastern Lightning member ten, _“China Gospel Fellowship”_ (CGF) kichi Underground Church lamkaite mi 34 kidnapped ana bawl ua, Ha 2 (2 months) sung ahentang uhi. Tualeh August 2014 in zong amauten Yantai Shandong kichi mun ah nungah kum 37 khat amaute biehna (sakhuo) zui dingin ajawl ua, tuanu’n ajui utlou ziehin avuo ua, zong athat uhi.
*A GINDAN U’LEH AKIHILDAN UH (Beliefs & Teaching)*:
Amaute Gindan in Thuhun Lui (OT) hunlai in Pasian khu Jehovah akichi a, Thuhun Tha (NT) hun khu Jesu Khrist hun ahia, tu Lungsietna Hun (Grace period) khu _“Almighty God”_ kichite hun ahi. Pasian in Khrist numeinu (Yang Xianbin) tungtawn in nna ahing sem a, Sawltahte sangin athupizaw hi, achi ua, tuachin *_Yang Xianbin khu abieh_* uhi.
Tam Pawlten *Yang Xianbin* (Khrist) in Hun Tha (New Age) ah vai ahawm dinga, mihingte thu akhenpie dinga, gingtute bou ahing ding ua, tualeh amanu gingta louten shina huoisetah leh gawtna huoisetah atua ding uhi. Tam pawlten _“Pasian a Mi Thum”_ (Trinity) agingtalou/ pom sih uhi. Amaute gintatdan in, tu Khang khu _“Mangtouna Kang Thutanna”_ (The White Throne Judgment) ahia, Pasian in thutanna abawl tahi. Denomination dang zousie khu Hagau Siengthou in anuosie siengta a, Church of Almighty God te bou khu Pasian in a umpi hi, chin agingta uhi.
Amau pawlte kithuhildan dung jui in, “Jesu’n Lungsietna Hun” (grace period) ah mite angaidam na hi, nanleh a hundamna bawl khu buching lou ahi (*Jesu’n*, _“Kei lampi leh thutah leh hinna ka hi, Keima a peilou in koima Pa kung ah atung ngai sih hi”_ *Johan 14: 6* tami toh kikal chet ahi). Ahin tukhang nukhie lam ah vang Almighty God (Yang Xianbin) thugen zui a gingta zousie’n hundamna buching anei ding uhi, ahin hundamna dihtah muna ding lampi kichientah in hilchetna abawl/ petuon sih ua, The Church of Almighty God thuhil zuite bou achi uhi. A *Laibu* uh _“The Word Appears in the Flesh”_ kichi ah tabang in agiel uhi, _“Bangkim bawlthei Pasian khu numei in ahing kilah dan in a gelh uhi_”.
Tami gindan dihloute khu _“The Seven Spirits/ Cry Cult/ Confession Cult”_ chin zong akithei uhi. *Cry Cults* kichi nasan khu _“mihing khat in Pasian gintat theina dinga ha kaa a kaa (cry) masat ding ahi, chi khu ahi. Kaana (cry) panglou in pienthana umlou achi uhi. Tualeh Kaa maimai a zong buchinglou ding, a kaa pumpum ua mangmuna (vision) anei ding uh, tua mangmuna in Jesu Puonkang a kithuom amu teitei ding achi nalai uhi. Mun khen khat ah mihing khat khelna sawpsieng ahina dia Ni thum (3 days) sung guntah a a kaa ngai ahi”, chin zong agen uhi. I Bible un lah, _“Mangpa Jesu sisan a sawpsieng ahita”_ achi ahi, nanleh amauten vang _“khelna khu luohkhiet (vomit) thoding in”_ agen uhi. _“Louhkhiet maimai zong hilou in, tui toh louhkhiet khawm ding ahi”_, achi nalai uhi. Tuachi’n _“a luoh (vomit) uh khu tui toh alouhkhiet khawm thei a ahileh a khelna khu kisawpsieng chi etsahna ahi”_, achi uhi. Ahin tuami ahi joulou leh leitungah khelna phuolgu khat nei nalai chin agingta uhi. Tuami ziehin _“Kaa leh Luoh (vomit) kichite khu kho neuneute lah ah apei mama hi”_.
Amauten mihing khangthu khu Pasian in kum sangguh adin aguotuosah in agen ua, tua hun khu *Hun Thum* in akhen uhi, tuate ahileh:
i) *_Dan Hun (Age of Law)_*: Tami hun sungin, _“Pasian in Israelte akep/ apui hun”_ chin agen uhi.
ii) *_Lungsietna Hun (Grace Period)_*: Tami hun ah, _“Pasian khu Jesu Khrist ahing peiin, mihingte a hundam hun, nanleh khiel thei ahina uh beisah lou”_ achi uhi.
iii) *_Leenggam Hun (Age of Kingdom)_*: Tami khu _“1991 kum a kipan ta, tami hun ah Pasian tu hun a ahing kilahna ah, dihtatna leh nasep bukim a mihingte a khelna ua pat suotat sah ding”_, chite ahi hi.
Athuhilte (teaching) uh khu Pasian thutah theisiemte adingin nuizat ahuoi a, thamlou in manlang tah a dihlou ahidan uh theikhiet pei thei ahi, nanleh a gammi Pasian thutah theiloute dia theikhiet pai hamsa mama ding hi. Tualeh amauten anasem ding un, _“Mi kamsiem, mipil leh mi feltahtah te adiehin nungah melhoite ahazat zieh un, ahun dungzui a thugen, lasah thei, mipil zong mimawl zong azawldan athei uhi. Kamdam azang ua, kingiemkhiet/ kingaingiem un, genthei hasate apanpi ua, akipawlkhawmpi ua, anunnem na uh mi a ensah masat ziehun agamtang thei uhi. Tuajou chiengin ahing thuzaw un amau dei dandan in apui ta uhi”_. Gingtute pilvang ngai mama hi….
Amauten Mailam hun a hing tung ding _“Kum Sang Leenggam”_ (Millennium) thu zong agen kha ua, tami hun ah leitung khu lemna leh kipahna leenggam ahi ding hi. Amauten apansan uh ahileh, _“Mayante Thugenlawh”_ (prophecy) 21st December, 2012 chiengin leitung abei ding chia atangkou u’khu lemtang a lah in nuazui ding suinan azang uhi, nanleh tuni chieng dawngin leitung bei nailou hi, tami gihdan dih na chi ngam paupau amah? Kingaitua ou, akikhel man.
*A NASEPDAN/ MISSION UH*:
Amauten amau pawl a midangte lalutna die poimaw asah uleh _“Thau (Gun) zat a huham tah a nasep ding, nungah khangdawng melhoi tahtah te brainwashing abawl ua, vanzat in anei uhi. Midangte lalutna din Sum, Silpieh, numei-el-pasal kipawlna te azang uhi”_. A tup thupite lah a khat ahileh, _“Numei pasal neitha pante, Hattuom hatloute leh House Church kichite akithuopi un, lawmtah bangin akipawlpi ua, tuazou chiengin amaute gindan zui dingin ajawllut/ apuilut uhi”_ chite ahi hi. *China People Daily* in agendan ahileh, _“Midangte amau pawl a kailut theite mi khat ah 20,000-yuan”_ ($ 3.237) apie ua, zong tuabang a mi puilut theite khu a ngaisang mama uhi.
Tualeh amaute a Mission nasepna uh suhatna ding in, _“YouTube leh Movies tampi abawl ua”_, adia a ei gam a khanglai tami gindan juite khu atamzaw tamna a platform zat uh (YouTube leh Khristian Movies) te a etna uapan ahing hi tangpi deu uhi, tuami ziehin Nu leh Paten, na tate un bangchi bangin Mobile azang uai chi theipi dingin ka hing ngen leh chiel hi.
*AKIVAIHAWMDAN UH*:
*Sociologist Fenggang Yang* gendan in, _“Eastern Lightning te khu Heirarchical (athuop a um, alienpen akipat kiguol suh) ahi”_ achi hi. *Inspector* kichiten gamkai a enkawl ua, *Overseer* kichiten tuolsung hattuom te a enkawl uhi. Gamkai leh Tuolsung lamkaite khu memberten ateel uh ahia, kalteng in inn ahilou leh community house te ah aki mukhawm ua, thumkhawm in bangkim bawlthei Pasian (almighty God) kilahna thute sim in a kikum khawm uhi.
*BANGZIEH A TAM PAWLTE HING HICHI PUN HAT MAMA UH ADIEI?*
Eastern Lightning/ Church of Almighty God ten Bible hapbe leh adeilam a kisutbe te, Jesu hundamna buchinglou agelte, Chinese numei Yang Xianbin in hundamna buching pethei chia gelte khu ahi uhi. Tamna gindan dihloute akipat hoita khat a na kivensiem mama angai hi.
Adihtah in China gamsung a atamzaw hattuom kivaihawmna in aphalpia vangin ei gam banga, zalentah a biehkhawmna umlou ahi. Leinuoi/ munsip ah husa ginglou (neilou) a Pasian abieh ding uh kiphal pie ahi. Tuami ziehin atamzaw khu *Underground Church* ahi. Tualeh Bible copy zong niangtah a kimulou in, mi nautangte dia Bible thutah adih-le-dihlou theikhen hamsa mama ahi. Mi khat in kamsiem tahin Pasian thu ahi chia siemtah a a hil theileh tua thukigen khu agingta pai thei uhi. Tamte zieh in gindan dihloute (Cults) hichia hing khangtou ahi uhi.
Tami gindan dihloute khu *“The Seven Spirits/ Cry Cult/ Confession Cult”* chin zong akithei uhi. Shanxi khuo akipan *Brother Liu* kichi pa khat, singtang khuo Hefei kichi mun a biehna nasem pan agen dan in, _“Rural Area lah a tami Gindan dihlou (Cults) te masawnna leh beilam atah a mi athuzawna uh azieh bulpi pen khu Singtang a teng miten Bible thuhilna, Bible thutah theina lam a atasap zieh uh ahi”_ chin agen hi.
*Akhupsitna*: Tunia bang zieh a tami Lamka Khopi (Gingtute khopi chia kigen) a Newspaper te a ka hing talat adiei ichileh, tamna igen Gindan dihlou zui Lamka Khopi sungah Khanglai bangja ahiei umta ahi, chi theina ding leh amaute Gindan dih a puilut thei kia nadia ka hing gel ahizaw bou hi.
Nang ma hoisahdan, deidan a kalsuon dinga Jesu’n Kross a ahingtat khiet hilaizang lou in, Jesu Khrist deidan, hoisah dan banga gamta dinga ahingtat khiet ahilam kithei tha in, Na laisiemna, na Lasa siemna tam Yang Xianbin gintatna dingtan a na kizat mai ding maw sanggam? Kingaituo in. YouTube tan a biehna nei dinga kiphal namah? Hing pei unlen, _“Tum ging leh zaila toh Pasian biehinnpi sungah Ama phat khawm vai”_. Yang Xianbin muonga ama adie kulmut mama te adin tunia ka thugel zumhuoi, nuizathuoi leltah na chi maithei ding ua, nanleh dachiah Natna zieh a thoujou lou a lupna tunga na hing um chiengin _“Ahing zing Pasian Jesu Khrist itna ngai in na um dinga, nanleh nang adin kikhel thei ta ding hi” aziehpen Laisiengthou in, “Mubei a aumlai in Mangpa khu sui un”_ (Isai 55: 6-7) chileh _“Tu hun khu hun kipah um leh Hundamna ni ahi”_ (2Kor. 6:2) ahi chia agente manghil sih vai ei.
*Nu leh Pate kunga ngetna*: Bang ding a nungah-tangval ten tam Yang Xianbin ahichi gintat uh adiei, azieh na thei ei mah? A neu ua kipat Sunday Skul kai ding sanga pilna siemna azil/ amu nading uh na buoipi zieh ua, tua hing pil, hing siem un, nanleh Pasian thutah a kibulphuna dihtah neilou ahi zieh ua, tua hing lampiel uh ahilam thei inlen, na Tate apil ding uh asiem ding uh na ngaisah bangin, a kumtawn hinna ding un Jesu Khrist poimaw ahidan hil zingdin kang ngen hi. Jesu Khrist lou in amaute hunkhe jou ding leitungah mihing koima umlou uhi, chi khu ahi hi. *Smart Phone* online class lana dia naleisah lai in, taten Yang Xianbin biehna din ana zang uh ahidan na thei ei mah?
Yang Xianbin gensie kahi sih a, Bible toh kitualou a gamtang ahidan michin thei dia ka hing gel ahizaw hi. Bible simtamte adin Yang Xianbin kichinu khu biehta hilou, juita hilou ahidan ang hilchien mama dinga, nanleh Bible simpeilou, biehna ngaisahloute adin zui beilam mama ahi hi, aziehpen hoina sangin sietna’n masawn zaw hi.
