HAKSATNA THUAK NGAM DING IN
Khrista Jesu â ding ah sepai pha tak gual in haksatna ei thokpi in
2 TIMOTHI 2:3
Haksatna ti umzia chu mani taksa leh lungthim ngaituana tawh kituaklo takah bawlsiatna tina ahi. Khristian khat chun a ginna ziakin ama mimal dawina leh utna lam zosia nusia leh nelsia in a Pathian thu tawh kituak in, Khristian hinkhua haksatna tampi thuakin malam zuanin Kal a chawi zing sek zaw ding ahi.
I hinkhua matna, nek leh chak i hawlna, i nasep nate chuleh mission na i sepna te haw ahin Pathian thutak zui leh hinpi zing i hina em?
Khawvel thil leh khawvel chiadan in vang bangma zawk lam a panglo (neutrality)ti a um thei hi. Pathian Thu in vang a umthei puai. Pathian a lahichun setan melma himai lahi! Setan dawigual a umzing kahichun Pathian melma kahi mai ahi. Pathian a hizel hilozel ti um theilo ahi.
Jesu nungzui ihichun setan thilte taisan tina ahi. Pathian thupiak leh azilsaknate za leh zui ding chu Khristiante ading ahin Setan leh thimlal nuai a khawsate ading hilo ahi. Pathian tawh Setan lunghawl a hinkhua mang a, kawpthiam Khristian lem ihi khak ding lauthawng um mama ahi. Khristian Jesu Gingtute hi kidona munah khawsa ihiu hi. Melma Pani, thim leh vak, thutak leh zuau kidona munpi ahin panna zawk sang neilo a umtheina ahi puai. Kua lam a pang ihiu em?
There is no neutral ground!
(Mat 12:30 Luk 11:23 John 3;19-21 John 8:44)
Tuni hin vak kingaitua pha kit chiat hitiu aw. Pathian thumatna tawh ama thupiak leh azilsaknate i lampiu ding a vak ahi hechian a ginum takah zui zing ihi nau em?(sam 119:105)
Pathian thutak a umlo ihiuchun banggual in mihiamte thiil in dem kailo leuhin le PATHIAN ei muchianpa ading in vang setan nungzuite, leisiat a setan kochuamte hiding ihiu hi.Pathian belamte puimangna sem zing belampu lem igam hin atam dingdan la ngaitua kha em? Nang kua Kochuam, Khrista Jesu Kochuam lahina em?
Pathian lungnatna i maitua ngam na diam maw?
(Ezek 7:9, Rom 12:192Cor 11:13-15 Mat 7:15-20 Phil 3:18-19)
Pathian thutak tawh kituak ahiphawt nak leh khawvel thil, lei taksa nawpnate, ki genphat ah pachak nate, hausat leh nawpsak nate leh minthang nate leh adang dang zosiate nungngat leh nelsia ah Pathian thutak a hangsan leh ginum takah Pathian nasem, suak pha leh ginum ihi nau em?( Mat 25:23 Sam 31:23)
Pathian leh a Thutak he in I nei tak tak nau em?
Mite I hetlo gen leh hil ihi khato diam maw?
Neilo piak gua ihi khak chun athawn sa hiding ahi.
(3 John 1:4 Sam 86:11)
Khristian ten I gin uh leh i biak uh Pathian ziakin lungngaina, bawlsiatna, huatna, gentheina, chagatna leh haksatna chuam chuam tuak ding in Pathian in ei dawi ahi. Thutak kumtuang hinna ziakah khawvel a haksatna thuak ding in, Pathian in ei hepina ziakin ei phal ahi ti hedawk thak kit leuhin nawp a um mama hi. Pathian ei ah atup thupipen leh a kipakna chu khawvel nawpsakna mang leh hausatna nei ding hilo ahi ti hiat chian ding ahi. I genthei ding dawi leh i haksatna Pathian kipak tina ahi puai. Lunggil, ngaituana leh hatna zosia ama ging ding in ei dawi ahi. Khawvel sum leh pai leh hausatna hin thamuanna leh kingakna lem ei pia ut mama ahi. Pathian mimatchak minthang mama John Piper chun Hausatna hi hansia lawna chikhat ahi ala ti ahi. Khawvel hausatna hin lunggel ngaituana zosia Pathian ei gamlat saktu ahi zaw sek hi ati nawpna ahi zawi. Pathian tawh kikal siat theina, Pathian a kingak zawna leh Pathian ngaina ei sumang thei chu khawvel hausatna ahi.Pathian ah bangkim kipedawk, bangkim ah Pathian ging leh muang dingin Bible hin ei zilsak/gen ahi zawi. Khristian kiti mi hausa tamtak um in au, hinla lunggil sunglam enchiantu chu Pathian ahi.Chagatna chu Pathian kipakna tina ahi ziang puai. CHAGA genthei tamtak Pathian helo leh Pathian ngaisaklo tam mama in a. Pathian in a hepi mama, ama sawlchak te haw leisiat hinkhua hatsatna athuak dan uh kha vak geldawk in ngaitua thak kit zel sek hitiu. Khawvel mite, ginglote leh Khristian lemte apat ti dudahna/bawlsiatna athuak nasa mamau hi. Jesu nungzui sawm leh nite thuakna leh a thidan uh kha huaisia mama ahi. Khawvel nawpna amatlo dan uh leh a hausatlo dan uh khan gingtute hinkhua hi nawpsakna lampi ahilo dan zillai phatak muthei ahi.(2Cor 4:16-18,Rom 5:3-4.8:18, 1Petr 3:14, 1 Pter 4:1. 2Chro 16:9)
Pathian thu leh Khristian ginna hi khawvel thil takah nawpsakna ding hilo ahi. Damna hiselna ding, tup mualsua nading leh hausakna ding a Pathian thu kilepna mang hung tam deu deu ding ahi. Pathian thu diktak ngaisak taloin mipite kipakna ding leh lunggel nawpna ding buaipi kitam deu deu ding ahi. Bible zilsakna taisan a lunggel nawpna ding buaipina hung uang deu deu ding ahi. Pathian nasepna leh gingtu hina hi khawvel thil a nawpsakna ding leh inkuan a cha leh naute khawvel thilah lawting nading bep buaipi ihikhak ding kivel thak kit hitiu. Ei mission/missionary nasem dan a um ngal hinla i chate Kaisar/khawvel nasem ding ah tilkho zing ihi khato em?
I gin Pathian leh a nung izui Jesu hih i cha leh naute ading a dawisaklo ihi khato em?
Pathian hi i hetlo uh leh i nei tak taklo ziakuh un Athu tak a Kochuam te i pui ngam puau hi. I cha leh i naute leh i dawisak mamateu le PATHIAN thutak hilin i kaihuai utlo uh ahi. Pathian Thu i chiapi dan uh hi ki etthak kit ding ahi. Kochuam leh mission nasepna i chiapi dan hawu le kisiamthak nading, aphalo nungsia ding tam mama ding ahi.
PATHIAN thutak hi hangsan leh A thu gual takah a gen ah dinpi ngam dingin JESU’N ei dawi ahi. Apha lam leh mipi vantang lungthim doina Pathian thu chiapi i tam tau ahi. Pathian dawigual leh athudik takin chiapi guat zawk zing ding ahi. Baptist Johan khan Pathian zakda thanghuaina (fornication) a tangkopi ziak in Herod Antipas in a gawl atan piak hi. Pathian thu, Bible in agen gual takah tangko ngam i gam leh i kochuam hin a mamaw mama hi. Bangkim Kawpthiam, sakhuana lungawi leh nuamsa mai ziang Pathian nasem kiti ut te haw lak apat pilvang ding ahi. Pastor, reverend leh upa hi ut, a umzia leh ahina dik tak helo kitam mama ding ahi.Zia haw hi ki chei mawina ahipua, Pathian ading ah mawpuakna ahidan geldawk thak kit hitiu.
Jesu Khrista Gospel diktak vang khau leh tâk tak ahi(offensive). Gospel hi kithepna, ki zawlna leh bangkim a mite ngainawp,limna ding leh mite dawigual ah ki kaihuaina thu ahi puai. Pathian hepina hi ihet nading in Pathian lungnatna i het masak ngai ahi. Chanchinpha diktak i hetsak nading in chanchin phalo umzia ihetsak ngai ahi. Leisiat mihiamte Pathian mu a i dinmun uh asiat dan, Pathian lungnatna maitua ding ihidan uh het poimaw masa ahi. Gospel hi ei taksa nawpna, ut dan dan a um zing a, Pathian hepina san ding(receive/beleive) tina hilo ahi. Gitlo kisikna leh Pathian lam kihei Kitna(repentance) hi phatak a chiapi ah genzel ding ahi. “Bang gual in khial in chawnsia lechun le Pathian in ahung hepi in, ahung hukdam nuam zing ahi tileh la hidan dan in Pathian lam hung panin” tihaw hi zilsakna ( faulty Gospel presentation) leh diklo ahi. Khristian hilote chun adin mun uh aphatlo dan uh akihet daw masak ding uh ahi. Pathian tawh kichamlo, Pathian do leh Pathian zakda zawng takah hinkhua mang ahidan uh hetsak ding ahi. Gospel hi Hepina hepina mawk hizianglo ahi. Gitlo leh sual simlo a, Pathian ging ti umtheilo ahi. Pathian pawmtak gitlo simna lo in hukdam/piangthak ti um theilo ahi.
Pathian Thutak a umte chun haksatna tamtak maitua zing ding ahiu hi. Insung leh chanaute apat inle bawlsiatna thuak ding ahiu hi. Pathian thutak a hing Khristian khat chun lawi leh pai nei tamlo hial ding ahi. Musit, gensiat, dem, diklo takah ngawna leh diklo takah bawlsiatna tuak zing ding ahiu. Khristian khat Pathian ginna leh athutak a um ziakin bawlsiatna i thuak khata em? Mite genphat leh pachat(acceptance and approval) hawl in i buai zing nalai em? Khristian chun a nung azui, a Pathian thumatna sangah thupi zaw dang aneilo ding ahi. Pathian dawigual sangah thupi zaw umlo ahi. Ki todel nading bep ahiloleh nek mu nading bep a sem kha ihichun lawting lo talua ding ihiu hi.(Mat 5:11, 1Ptr 3:16 John 15:18-20 Eph 6:6-10 Mat 23:11 Deu 10:12)
Zia bep chu hilo in Gingtu diktak lahichun khawvel leh sakhuana pawl chuam chuam inle hung umsak nuamlo ding uh ahi. Ki vaihomna dan leh ki etkawlna dan te (Man-made Rules and traditions) zalo leh kal in ngaw hiding lahi. Musit leh diklo takah thiamlo hung chan ding tam mama ding ahiu hi. Khawvel ahin adiakin Khristian lem te lakin,Pathian thutak a la um ziakin thitiang a hung gawt nuam le tam ding ahiu hi. Hinla ziahi tepte zingin Khawvel zota, JESU lanei khan hung umpi zing ding ahi. Thuak hatna hung pezing ding ahi.(Sam 27:14 Sam 31:24 John 16:33)
Banggual in Khrista hepina ziakin Thutak gen in tangkopi zing lechun le miten demna ding hawl zing ding ahiu hi. (1 Corinth 1:18)
Pathian thutak gen leh Pathian min ziakin Khristian diktak te chu huatna tuak zing ding ahiu hi. Huatna leh bawlsiata Khrista zalah thuak theite chu Pathian kipakna ahin, mizosia lakah eng umpente ahiu hi! (Luk 21:17)
Khawvel leh setan thimnuai a khawsate apat pachak leh pawm ding chu Khristian ten kineplo him him ding ahi. Pathian lam enlo a leisiat mihiamte la et chun thafangna leh lungthuaina mai muding lahi aw KHRISTIAN..hat inla hangsan in!
Khrista nungzuitu diktak te chun haksatna tamtak thuak ding ahiu hi. JESU la zuina hin la chán dingte la ngaitua khata em? Bangcheng sangah lopi leh lulzaw zui lahi lam laki hedawk kha sek em Unau?
Hangsan takah a KHRISTA THAWKNA THUAKPI DINGIN la kisazo na em?
2 KORINTH 1:7
Chun, thokgimna chanpite la hi gual un, thamuanna chanpite le la hiu ti ka het un ka hun kineppinau a det tai
ROMTE 8:17-18
[17] chuleh, chate I hiu chun, golua dingte I hiu ah, Pathian golua ding, Khrista tawh golua khawm ding I hitau hi; ama lopina I chan khawm theina ding un, ama thokna le I thokpiu a ngai hi. [18] Tu’lai thoknate hi tu’nung ah lopina I chung ua hung kilang dingte chu tawh te’pi kham in ka ngai puai
1 PETER 2:21 Khrista’n a hun thok piak ziakin, zia gual hiding ah chun ko la hiu; a kengnung la zui ding ua a hun nutsia piak la hiu hi
Lalpa Pathian in simtute zosia ama lopina dingin athu ei malzawl piak tahen aw..AMEN
