24th June 2024 | Get in Lamka News| Reporter by Samte
Tuni June 24 2024 seppatni sunma dak 11apan in Indigenous Tribal Leaders’ Forum (ITLF) lamkaih na in Public peaceful rally neih in om hi ,lamzuihna bel Pherzawl, Kanggui, Tengnoupal leh mun dangdang ah leng ahun kibang a neih hi a, lamzuihna neih hunsung in khopi sung ah total shutdown puan a om in dai sisip hi.
Lamzuihna hun ah Union Home Minister, Amit Shah a ding memorandum piak hi a , Manipur tualgal ziak a mihing hinna ban ah neih-le-lam tamtak mansuah a om in, kha 13 bang pailiam mahleh buaina vensak ahihna dia central apan panlakna omlou ban ah sepaih thahatna toh thagum suahna beisak ding sawm a panlakna om dia hong kisa abat dungzui a political solution a omtheih masiah kilemna omlou ding chih mipi deihdan latsakna leh, hun dang a political demand kichian tak om theilou a Separate Administration phut in om mahleh, tua SoO group in political demand a piaklut, “Union Territory with a legislature under Article 239 (A) of the Indian Constitution” phutna nungthuapna dia “Rally to Expedite Political Solution for the Kuki-Zo” chih min voh a public peaceful rally neih aom hi ahi . Lamka Public Ground ah lamzui di te paikhawm in, huai ah NJ Haoneo leh Richard Hmar makaih a hunzat hi a, Christian Goodwill Council a secy Rev. Lalthantluang, in patna thumna nei in, Pagin Haokip, Chairman, ITLF in vaidawnna thugen a, Muan Tombing, Secretary, ITLF in memorandum piak ding mipi simkhiakna om nei hi Mipi palai, MLA teng sik in Paolenlal Haokip, 59 Saikot Assembly Constituency in thugenna hunzang zom a, Rev. Dr. VL Nghakthang, Secretary, Zo United leh Jangmang Haokip, Vice President, Kuki Inpi Manipur te apan in thugenna om hi, Pauneilal Haulai, General Secretary, Zomi Council in lamzuihna ding khah khia hi. Tunia lamzuihna ah mipi tamtak kihel in, huailak ah June 6, 2024 a Jiribam apan Meitei galvan tawi te’n a pikhiak uh, Thianlallianmuang@L. Muangpu s/o (L) Luai-am Langel, tapa Siamlian in apa’ limlak leh apa pikhetu lim tuanna banner tawi in, apa’n thukhenna dik a tang ding deihna in rally hun ah kihel hi. Siamlian in hiai hun ah dotna bawl aom bangbang dawnna hoihtak pia in, a Nite inn ah apa toh electric fan bawl a kuan, hong kiklam a Ni tapa in vakha in, gate a tungkik uh toh kiton a Arambai Tenggol pawl Gypsy a tuang te’n apa pikhia in, hong khanawn ding in gen mahle uh tuni tan apa’ apan bangmah azak nawnlouh ban ah Arambai Tenggol lam apan leng bangmah zak neilou ahih dan gen a, apa pikhiate lak ah Jackson Thoiba kichi Uchathol a teng leng tel ahih dan chiantak a thei hi’n gen hi. Saikot constituency MLA Paolenlal in a thugen hun ah asi teng si in, inn kihel teng kangmang mahleh tu-le-tate khualna a chihtakna toh Meitei nuai ah om nawnlou a, mahni kivaihawm ding deih a kalsuan teng zahna chibai buk a, hiai bang rally neih a hihnawn hun ah tu-le-ta te’n ei thuak bang hon thuak nawnlouh ding uh deih mi tamsem kihel a, public ground a dinna ding awnglou zen a mipi paikhawm hunta ahi chi hi. Aban a genna ah kum khat hoihtak a val sung Prime Minister hi’n Home Minister toh kimuhkhawmna neih in omta mahleh huai in buaina vengsak zoulou ahih dungzui a kilemna taktak deih ahih uleh Lamka ah hong kalsuan uh ngaita in, Lamka ah hongpai un chi’n sapna bawl hi. Huchih dungzui a mipi palai hi’n CSO tuamtuam hileh, amaute toh kihou dia kuamah New Delhi ah hoh nawnlou ding leh, ei gamsung thu toh kisai ei gamsung mah a gen ding ahi chi a, CSO makaite leng kuamah Delhi ah taitai nawnlou in, gamsung thu gen ding achih uleh Lamka ah hongpai ua, Lamka mun a gen ding ahi chi hi. Nam lianzaw te’n thah chimit ding honsawm ua kum khat val ganhing bangmai ua hon thah lai ua bang chibang Prime Minister hi a, bang chibang Home Minister hi uh hiam chi’n dotna bawl a, Kuki-Zo tate’n Dan bupi nuai a tanvou, mahni kivaihawm ding theihpihna Lamka mun mahmah a genkhawm ding ahi chi hi.
ITLF Presidential Council in lamzuih na maakaih a, mipi’n placard tuamtuam tawi in zui ua, Lamka Public Ground, Hiangtam Lamka apan Wall of Remembrance, Tuibong tan mipi’n lampi zuihna nei in huai ah palai 10 in Union Home Minister Amit Shah kiang tung ding Dharun Kumar, IAS, Deputy Commissioner khut ah memorandum piakna nei uhi. Memorandum piak aom ah Manipur a thagum suahna beisak a lemna aom theihna dia a panlakna kipahpih ahih dan taklang in, huai lungsim mah toh Manipur a lemna piching aom theihna dia central government in political solution abawl dia ngetna bawl uh ahih dan taklat in om hi. Atak mun lungsim ah koihkawm leh, michih hinna humbit ahih a, zalen tak a hinkhua zat ahih theihna dia Kuki-Zo tribe apan SoO group te’n “Union Territory with a legislature under Article 239 (A) of the Indian Constitution” kichi political demand ngetna bawl uh ahi chi a, Manipur buaina dinmun in hoihlam manoh tuanlou leh, singtang gam a hinkhaw zatdan in niamkiak lam a manoh dungzui a kintak a political solution poimoh ahih dan taklang in, singtangmi te’n political solution kintak a poimohna ziak taklat in om hi. Huai ah kum khat val thah leh galtaina aom nung tanpha ah leng security dinmun in hoihlam nawtlou in, niteng a thahtheih dia michih dinmun lauthawng huai aom ahi chi a, kal tamlou pailiamta ah singtangmi mi 2 Meitei te’n Jiribam district ah that in, midang khat pen dinmun theihzui hilou ahi chi hi. 
Buaina kipat nung kum khat pailiamta mahleh singtangmite inn leh van tuamtuam halsak a omlai ahi chi a, tuni tan ah singtangmi 200 phial thah a om in, tenna inn 7,000 val hihsiat ahih lai a tulai a Jiribam ah singtangmite’ inn leh dawr 50 vel halsak aom ahi chi hi. Niteng poimoh tel a van himhim singtang bial lut ding kum khat val hentang a om in, hospital a poimoh Patzam natan kidaihlou in, huai in singtangmite hinkhua naktak a niamkiak sak ahi chi a, Meitei thuneihna phaizang in state deihsakna atang lai in, singtang bial ah kum khat val khantouhna vai a nasep tengteng leh, a omsa puahphatna himhim khawlsak aom ahi chi hi. Phaizang mipi’n niteng poimoh hamphatpih theihna tanvou nelhsiah sak in electric tanpha hihsiat sak uh ahi chi a, singtangmi kuamah state capital phatei a omlouh hun lemtang a zang in, Meitei thunuai aom state government in semtu lakna dia recruitment naktak a bawl in, huai ahih dungzui a singtangmi tuailai tamtak sepna muthei ding te’n mansuah in, hiai in state government in a langtang a khentuam nei ahih dan a latsak ban ah siamsinna leh head office teng state capital aom ahih dungzui a singtangmi siamsin tamtak, adiak a technical line sin te’n leng haksatna liantak tuak uh ahi chi hi. Nam tawmzaw leh milip a leng tawmzaw hih dungzui a mahni kivenna ding leng kichi neih a hihlouh dungzui a Meitei galvan tawi, Arambai tenggol leh UNLF te’n gamgi pawlam apan a laklut leh state galvan a luhkhiakte uh zang a buluh tuakthei gige a hihlai a, amau apan thah chimit hiam, gam leitang apan hawlkhiak ding chih kampau zalentak aom ahih dan taklat hi a, hiai tengteng ziak a political solution kintak a poimoh in, Manipur a thagum kisuahna leng beisak ding ahi chi hi. Sisan kisuahna tamtak ban ah tamzaw hihna neite galtuam toh thop ahih nung a leng state thuneihna Meitei khut a om in bawlsiatna leh gimthuakna tuah ding theihsa ahih dungzui a gam leitang ah kikhenna om ahi chi a, political solution aom theihma adia singtang district teng in mahni kivaihawm theihna dia secretariat kineih chiat ahi chi hi. Tawmzaw hihna nei Kuki-Zo-te, bit leh kisaktheihpih tak a Manipur ah tengthei nawnlou ahih dungzui a Union Territy with a legislature under Article 239 (A) of the Indian Constitution kichi, Manipur singtangmite adia poimoh leh a lunggulh uh, political solution leng aom theihna dia ngetna pichin sak ding a ngetna bawl in, memorandum ah Pagin Haokip, Chairman leh Muan Tombing, General Secretary te’n suaikai uhi.
Wall of Remembrance ah hun Kuki Christian Leaders’ Forum apan Rev. Dr. M. Thangkhosei Haokip in thumna in hun khakna nei in lamzui te kikhen uhi.
