KHAWVEL HUKDAMPA JESU PIAN CHAMPHA BANG GUALA LAWP I GUAU EM?
-KL Muana Khaute
Khawvel seta nung tan dawk ding in Pathian in, khawvel kidak umtak chu tan dawk ding in. A zawl neite lungthim in chi a tu a, mihiam te kinep gual lo tak in kumtam tak nung in, a lampi lamhiltu ding a mithiangtho te lamliam a sialpiak sa aum ah, mihiam te lung buai leh lungngai leh beidawng tak ah, a um nung un, a taksang pawl leh a ging pawl a hun um pan tau a, A taksang lo ten khawvel sualna chitin bawl in, thuneina leh lalna a ki chu un, gam khat leh gam a kido na, leh nei leh lamte kichu in, Pathian lunglam hawl lo in thanghuai na tin cheng a sem ua, A hinla Pathian ah, kipakna him him a muh zo diak puau ah, buai na leh lungzin na in hinkhua a mang uh a hi, hepina umlo in hinkhua mang zo tau ah, a kumtuang mun, diu chu beidawn um tak a hi mai hi.
Ziagual bawk a chu khenkhat Lal Immanuel khawvel huk dawk ding chu mûnuam maleu a mualliam zotau ah, Khenkhat te chun hukdam Pa chu a mit ngei un, amu man ua, a mumanlo a damkum un, a ngak zaw taklo um ma leu, aginnau tawh mual a liam San ui.
Hun chu a hun chia zel a Khawvel hukdampa hung na ding a chun, a lamlian siam tu ding in, zawlneu nunung pen Johan chun, mipite chu tui in a, Baptish sek ah, lamliam siamtu a hi dan leh a nung a Pathian chapa hung ding pa chu, A kengtawdap phel tak le a hilo dan a gen hi, zia gual ma chun Pathian chapa chu ahung ta ngei ah, tichun tui leh thagau in a Baptist a hi, van a pat thagau thiangtho vakhu gual in, a chung in a hung chu ta, ‘ zia hi ka chapa dawitak kawng bangkim in a thu a la ngai un,’ a hung ti ta, zia phat a chun mipi te chun pathian chu a chawi hawi tau a hi.
Hukdamtu khawvel tan dawk ding ah hung Pa chu a hun sawl ta, Mary Nungak thiangtho sung a chun, a hung piang ding Lalpa van sawlsawl chun a hun hil ta, Joseph in, a zi ding ah, a hual Nau hungvawp mai, Pawm thiam hak ma ina maw? A hin la Pathian thupiak a hi ziak in, thumang tak a pawm leh zui a ngai mai a hi.
Nausen Emanuel khawvel hukdampa chu mihiam gual a pian ngai a hi tak zia in, Lalpen chung nung pen, himale mun nuainung pen, Bawngbûk in, kei le nang a hepi ziak in a hun tel zaw a hi. Phalbi vuksan laitak in genthei na haksat na tampi thuak in, a hung piang ah, a genthei ding dan chu mihiam paukam inle, gen di dan le a um thei puai, zia gual lawm ei hepi na thuk le gil hi, mihiam kampau in genzaw gual chi ei puai.
Zia gual a khawvel huk dam Pa piang chu, mihiam ten lawp in chawi hawi leu ki lawm tak in, Leng Herod in tha ding a guang galna na mai leh a gentheina, eu a dinga Van Lal chutpha nusia ngam ah, a nasep hi, Pa hepi na a chate a dinga ah, a lemguat hi, mihing pilnnan a hezo puai.
Pathian lem guat dan hi, mihing pilnan a he zo puai, kawng zat chuam chuam in, Setan lemgel nan Lapa hukdamna kheltan gua in, thachimit guan, pan lama leu, a lawsam uh a hi, Zia ziak a chun khawvel pukta thiamlo chan ding sa te a dinga chu, hukdamna dawng kawt ahung ki hawng a hi. Juda -Israel ten a Lal uh pawmlo phat un, ei gentile te a ding in, hukdam na dawng kawt ki hawng chu vangpha I hina maizen uh eh maw?
Zia hepina mak eu a dinga hawnpiak. I hinau hi hemil lo in I hukdampa chu Leng Herod gual ah vaitut lo in, saklam mipil te gual in Sana, Bego leh murra te mang in i lungthim pumpi un, Lalpa a ding a hawng in Chibai’ buk hitiu, zia tak chu leh van Angel te tawh huntawp umlo in gualzaw na lâ kumtuang in lem khawm ding ihi tau.
