LEMCHÎN(FILM/MOVIE)
-KL Muana Khaute
Lemchîn/Limthaw hi mihiam te hinkhua chia zel a hin pawmawi tamtak a um ah, hiatna pilna phatchuamna, khantona te a belap hi, himale lemchîn phalo khenkhat te ziak in mihiam lungthim a su bawllaw ban in, siatna tam tak leh buaina hun tiang le a um thei hi, zia ziak a chun lemchîn( film/movie) thaw leh bawl te hin mimal khawtang gamsung khanto na ding leh khanto na lam nga-zâwng a bawl thei chiat leu hin, mimal leh khawtang in a phat chuampi ka ki nem hi.
Masang lai deu a khan Lamka leh Imphal vel a Cinema hall a film leh video parlour vel a film chi chuam chuam I en thei sek ah, imit leh ingaitua na le a su lim thei mama in ka hiai, a hinla, film leh video hawi tak tak a um zing lai in, hawilo tak tak te le a um ah, mi khen khat phat chuam na a um zing lai in, tam tak te a dinga siatna a tun thei hi, a bang chu hi ta leh a siat a phat chu a en tu te chung a ki nga a hi ti phawt hi tiu.
Khawvel a changkang tawh ki dung zui in, tulai in Television leh mobile nawp nawp a sua thei a, adiak in mobile hi mitin et thei in a umta, a sia a pha a hun hun in a hiat thei in a mu thei ta, ip-guk a hem kihet maw bawl thei bang ma a um ta puai, tithei phial a hi, himaleh khawvel leh mihiam te phatchuam na dinga a pha moral um leh thiangtho deu bawl leu hing chuh, gitlo na tawm deu ding in ka ngaitua hi.
A chunga lemchîn i gen te hi bukim tak a gen seng le hi puan tin, ei Manipur context ah, Action film khen khat a pha ka sak lo neukhat vak tak lang hitiu, Meitei lemchin khenkhat a Numei kina ‘Hingchabi’ (kauneinu/sial-nenu) nungak in tangval a muda deu in a thaw/Sai/hel /dai) phat uh leh Tangval te ngei-phelep a bet piak ti vel a tam a, chuleh numei a ki lungsiat pi le hilo ki pummat tivel a tam ah, zia haw ziak a hin ki suk thangtawmna a um thei ah, nupan ki lungsiatna le a kiam thei hi.
Tulai serial khenkhat vang hi zi Pani nei ti vel cinema muding a um zeu zeu ah, rape( ki pawngsual) leh numei leh pawsal ziak ah ki tualthana te haw hin mipiting nailo te a suse thei a hi. Chun Election di ziak a gang siam, sum leh pai tam tak tak a ki chawk ti vel, Minister hi na dinga sum piak, sepna mu thei na ding a sum ki piak na leh Lal nawp ziak a kithana ti vel hi, a chawi ching um mai thei a hi, himaleh film le mit a muchet le hilo ngaidan/Fiction suklat na te ziak a hin zillai te moral a suse thei hi.zia I vak tak lat neukhat te khawvela thil umsa leh umzel ding himaleh mit a mu leh bil a imu zing chun kitaksan na leh kihepina kiam deu deu di a hi ziak in suklat tamlo chu thil pha pen hi zaw mai thei din ka ngaidan ka hun ziklat a hi.
Awle, zia a chung thupi Lemchîn(film/movie) a chin dan pha leh phalo igen te hi pawlpi/Inpi Govt. ki vaihawm na ah sia (fee) a hi, mihiam khankhua piak lo thei lo leh bawl lo thei lo ti lo phawt hi, ei christian te gindan tawh ki tuak lo, Pathian in a chate bawl lo ding a ti phawt hi bawl da mai leuhing chu, Pathian cha dik tak khawvel leh a sung a cheng mihiam te hin Pathian Hina dik tak hi, hung mu thei mai ding chu a hia maw! Pathian cha dik tak ihi thei na ding in zia khawvel mite bawl hi taisan in chapa golua tu dik tak hi thei na ding un, Lalpa thagau thiangtho chun I mau ei pui zing ta hen.