MAWPUAKNA ZO CHU MALZAWLNA’N A LAMTUA HI
– KL Muana Khaute
Mihiam hina dawl ah mimal tin in mawpuakna I nei chiat a, ei mawpuakna chiat I sep butin chun I kipak sek hi. Amabo, mawpuakna I liangko ah umte manlo ziak ahem, thatda ziak ahem ah sep bukim zawlo le a um thei hi. Mawpuakna zote chu a kipak sek un, a sepnau ah le a lawting nuam sek ui. I sep ding ah umte I zawlo tak leh kipakna a um puan, mipi lam apat le thiammawna a um sek a, kiphak lamna le a tam sek ban ah kingaisiatna le a um sek hi. Himaleh, lungthuailo ah kukal tak ah I sep dite gunchu tak ah I sep ham ham chun lawtinna a um thei hi. Zia ziak achun, kukalna leh tup-guna hin gual zawna chanthei ahi.
Khawvel ki taitetna hin a zo di mawng a um pua mihiam lungchang ah kinga ahi. Tupna a um leh gualzawna chu mi zosia a ding ah guat ahi. Nasepna ahem lekha zilna ahem I lunglut a, tupguna nei kawm ah takchapa ti ah I pan chun bangkim ah lawtinna um ngei ding ahi. Thilgun sepzawna ding achun thi leh thau pawl ah Lalpa muang kawm ah a thiltupteu chu titakna tawh pan ahichun gualzawna chan hiding ahi. Ahinla, tup nei zinglai ah thepnate, thatdanate kithunun saklo ah kung-lâm del ham ham ahichun malzawlna’n ei lamtua ngei ding ahi .
Khawvel ah leng leh khawsa I hiziak in kua ahem in muan ngamna ziak ah I zawlo di mawpuakna ei pia a um sek hi. Zia hi ki etsinna leh kipukna ahi’n, I chung a zaw ding ah lawmlo mawpuakna kipiak hi Pathian in mihiamte I mizia a etna ala hi nuam sek hi. Zawlo ding mawpuakna kipiak hi gawtna chikhat gual ah lakthei himaleh mi muan um tawk ah dinmun neithei chu mawpuakna zaw gua ham ah panlak a pawimaw hi. Zia hi thununna ‘training’ kipiakna gual ah ngaih a, zo-ngei ding ah Pathian pilna leh hatna hi tuk chak ham ham ah, haksatna bang gual hungtung leh le, lunglello ah zo chiat ding in Pathian thununna ki zêm ah I kalsuan diu ahi. Zia ding achun Lalpa’n ei panpi chiat ta hen.
Adam leh Evi’n Eden huan ah theiga neklo di a nek ziak un nawdaw in a hung um ua, khawsa-ul pawt leh thisan-naisan pum ah nek hawl di leh chi supung ding ah hansia law khum in genthei liangvai tak in Eden huan pawlam in hinkhua a mang ua tichun suan zosia pa a hung hiu hi. Zia gual bawk achun, Israel-te khawvel gam tin in thezak in a um ua, khawvel thiamna zosia a hun zil thiam phat un, a gam uh a zuan kit ua, a thiamnateu leh pilnateu mangkhawm in zalen gam a hung mu tau hi. Tuhin khawvel gambung neupen himaleh lopina’n a tuam a, khawvel mite mit-hip leh ngaivenna mun pen leh ngaisan um pen khat a hung hi tau hi. Ei Zo-suante le haksatna namenlo tuak in khawvel mun chuam chuam in khenthang in I um ua, pilna chikim tawh Zogam paklunna ding in khawvel mun chuam chuam apat thiamna pawlut hitiu in tichun tuibang gawm-ni hun suak ngei ding ahi.
Khaile, mi’n I zawlo ding ah a ngai uh mawpuakna ei piak unle, amau ginchak khellam in gunchu leh titak zet in ngaituana seng in sem leu hin ei mualpho sak guate mualpho zaw ding ah siamtu’n guanggal intin ei lawtin sak ngeile I kinem hi. Ziakachun, hattak leh kukaltak ah Pathian muang ah sep leh pan thua leu hin malzawlna dawi um tak tawh gualzo ding I hiu. Lawtinna leh malzawlna chu Ama apat ahi ngal ah.