MEITEI GAAL LEH TUAL, THIGUAPI GUAL IN EI NAWKHUM ZIANG TAMALEH, GAM LEH NAM DAMNA DING IN……!
✍️
Aziktu: Pu Ginlalthuam
Lalgin inn
Mualngat innpi
Khualzinna gam
(Land of pilgrimage)
🌹GAM LEH GUA KITI HIH LALPA PATHIAN Â AHI🥀
✍️
Meitei gaal leh tual, kumkhat valving veng phutlo, halo in ei hun luankhum ziang tamaleh gam leh nam, khua leh tui damna ding in Lalpa i Pathian, I kiang un ei umpizing hi. Van ah um Hatchungnung, Lalpa Pathian in i gitlona teu ei ngaidam ta, i chung ua a zangaihna te alatsak zinglai cha hin, ama kianglam in i nampi lawng uh tawl in a mipite hih Lalpa kianglam ah kile kit hitiu.
Muantak, Lalpa Pathian I nei uh ahi.
Tulai khawvel thuthangte hiatna ding ah news, social media et ah buai leh lungkham sang in, kisik ah Lalpa Pathian kiang lam zuan in lunggil tak’in pauchap hitiu.
GAAL LEH TUAL I TUAK PHUT TAK ZIAK ‘UN, LALPA PATHIAN APAT I MAMAWH UH UM NGEI DING IN KA GINGCHA, ZIA CHUH:
1. I nam min uh lâm in khutzak pum’in i pauchap diu ahi.
2. Khawpi lian hin, khawneu cha chate chuh geldawk in, taksa leh thagau ah siamphat,
chuleh Lalpa Pathian hatna suang in, kisik in Hatchungnung Lalpa kengbul ngeih in pauchap in idawn ding uh ahi.
3. I thingtâng khua leh tui adamna lai siah bek hih zamsan/pensan san lo in, siam piti’n/sukpiti’n ding zawk guachiat hitiu.
4. I khua leh tui, i Inn i lou, i gam i guahte, gaalte khut ah tuchan ah suksiat a umlo te siahbek chah hih sûkchimit ahilona ding in, i Lalpa Pathian kiang in mitthitawl pûm in pauchap in dawn zing hitiu.
5. Sakhualam hotute, khawsung vaihawmtute, nam puitute, politic puitute, sawlkâl nasemte, zillaite, nam sepaite leh volunteers (khua leh tui vengtute) zosia ading in Pathian kiang ah lunggil tak in dawtpi in pauchap zing hitiu.
6. Nampi kisik ah ” PATHIAN BUAN AH PAUCHAPNA” ti’a, sakhawlam i hotute’n eila guan piak tâk uh khâh; sunzawm tou zel thei hile maw….!
7. Lalpa Pathian chuh nam ah neingeih ngeih ding guachiat hitiu. Chuleh kipumkhatna dawm sang zing hitiu aw !
8. Sakhua leh taksa ki vaipuakna na tiang in i unau Mizoram leh Chin Hills tawh i kipumkhat zawk diakna ding kisiam thei henla, greater Mizoram puanlap kikhaisang maileh maw….!
GAAL APAT I DAMNA DING UN…….!
Ziah anuai ah Bible changte hih vak tiam/sim suk hitiu:
📖
“Israel chate chuh a saltan nau ah chun a thûm un, a kap tau a. A saltannau ah a kaa thawmteu chuh Pathian kiang a tung ta’n”. Pawtdawna(Exodus)2:23.
“Samuel in Lalpa kiang in Israelte a ding in a dawt piak ta’n; chuleh, Lalpa’n a lawtin sak tai”. 1 Samuel 7:9.
“Ziah tak achun David in Lalpa hona dingin maicham a siam ah, halmang thilpiak leh kichamna thilpiak a lân tai. Tichun, Lalpa’n gamsung a ding ah a dawtna chuh a dawnhu a, Israelte lak ah natpi chuh a ladawk tai”. 2 Samuel 24:25.
“Aw, Zion chanu, la lunggil tak in Lalpa ko inla ! A sun a zan in hawktui luang gual in, la mitthitui uh luangta hen ! Chawlngah kiu inla, lamit le chawldam tik um ki’hen ! Zan khang lai leh zanven lim a kipat in thodawk unla, kap tau in ! Lalpa ang ah la lungthim uh, tui gual in luandaw sak un! Kawtzing kiltin ah gilkial ah basam la chateu hinna dingin la khut uh a chûng un zâk in”. Kaa laa(Lamentations)2:18 &19.
“Kawlkawdawng tiang ah thezak ah um hiziang leu chin uhle, Lalpa la Pathian un hun puikhawm kik thou thou ding ahi”.
Dan Lekhabu 30:4.
“LA mau achun hinna leh thina, malzawlna leh hanse lawna ka kawihi.
Chutichun, nangmau leh la suanteu la hintheina ding un hinna chuh tel tau in; Dan Lekhabu 30:19.
“Linling huaisiah tak te hungling intin, munchuam chuam ah kial te hung kia’ntin, hiipi hungleng intin, van ah kipat thil lau umte leh teptena nasa tak te hung um in ‘a”. Luka 21:11.
I Lalpa Jesu Khrista’n, a mi thiangtho te pui ah a ni vei hung na ding ah thilmak tamtak (signs) Imu tawh kitawn in, kisa zosa i um theina ding un, Pathian zangaihna leh Thagau Thiangtho chuh kap pum in dawn hitiu.
“Van ka hun khak bit ah gawtui a hung umlo hun ahem, a gam nezo ding ah khaubepite thu ka hun piak a hem, ka mite lak ah hiipi ka hun lensak phat leh, ka min puh, ka mite a hung kingaitawm ua, a hung pauchap ua, ka mel ahun hawl ua, a nun siatnau lampi a hun kiheisan phat ua leh, van ah kipat hun ngaitha’ng ka tin, a gitlona teu ngaidam in, a gam uh hidam kik ding ka hi”. 2 Khangthu( Chronicles 7:13 & 14.
I gam leh i nam uhi adam tithei ahi tapuai, u leh naute haw….. ala ngaih tuahim him tia, tuchung ah i gaal tuak uh hih khangtam tak ala chia tah, Pu leh pate’n ala tuak uh Pawi/
Lai gaal huipi khatawh bang gual tiang in a kikhiah diam ?
Hun nunung lam ahi tak ziak’in…. “Pathian in namkhat chung ah vai a hawm piak nuam phat leh hotu gilo apiah sek ahi”. Ti’in, John Calvin in ala gen hi.
Zia thu hih ngaitua kham tak ating ahi.
” LA PATHIAN TUAK DING IN KISAZO TA’N”. Amos 4:12(b)
Tulai khawvel thusuak/lasuak te i ngaitua phat takleh, mihiamte gitlona, sualna ziak in Lalpa Pathian a lungdam talo ah bang hi.
Thikthusia, Hatchungnung, Pathian lungnatna hih a pelthei ding mihiamte ki umlo ahi, alau umtalua ahi, ka mihiamchan khawmpite, Lalpa Pathian hih beltâk tak’in belzawh mai hitiu e.
I khua leh tui, i gam leh nam, taksa leh thagau ah i damna ding un, Lalpa Pathian ilunggil tak’un ko hitiu in a thupiak te zuiham ham guah in, mitthitawl pum in pauchap in dawn zing hitiu aw…!
Mualngat khua (frontline) himaleh, Lalpa Pathian venbit na leh nangmau ei pauchappina zal’un, khua leh tui vengbit zingthei nalai in ka khuasa theiliai liai uh ahi. PATHIAN CHUH I TAKSANG UI (IN GOD WE TRUST) titawh THAMUANG TAK IN UM IN, LA GAM LAHUNG TUNG TAI (BE AT PEACE, YOU HAVE REACHED YOUR LAND) Chuleh thil pani, gaal ei vengpi ding ah hungte zosia kala muak (welcome) nau chuh:
1. Khamna thei kisum ding, chuleh
2. Lungnat kisum tinten ah gaal vengtu/khua vengtu higuat ding tihih Mualngat khua’n, tuchung gaal i donau ah thupi in kamang uh ahi.
Chun, kikaptuana (firing) ka tuak munten vang un, Lalpa Pathian ei umpina leh ei venbitna zal in tuni chan in luvawm mansua hial vang ka umsam puau hi. Lalpa chuh pak’in umzing ta hen.
TUCHUNG GAAL BUAINA ZIAK AH KA PHATCHUAM PITE:
1. Gaalvan hawipen leh thupi pen, Pathian thûh nasa tak ah ka dawn danteu.
2. Pathian hepina, lungsiatna leh venbitna giltak ka dawn danteu.
3. Lungkham ziak ah dipchung ah hatlah zing ki himaleh, taigil ah hatlak dan ding ka dawn danteu.
4. I genthei, I haksat, I lungkham leh I beidawnna tawpkhawk te hih Lalpa Pathian ei selgukna khat ahi thei hi.
5. La lungsiatnau nasa tak, thilpiak ahte ka dawng zing un, lei pauchappi na teu ka dawng nasa khawp mai ui. Ka kipak tak zet ui aw…
Ziah te zosia ziak’in Lalpa Pathian chuh chawihawi in umzing tahen.
Simtute zosia’n, ei hung pauchappi zel un aw….!
Awle, atawp na ding in, Lalpa Pathian hepina, Lalpa Jesu Khrista lungsiatna, leh Thagau Thiangtho kithua pina chuleh venbitnate, I leng ua chung in tu leh kumtuang tiang in um zing ta hen.
🙏 Halelluijah ! Amen.
✝️💘✝️
