NICHIN THUMNA PUITU
By Rev. Awnkhankhup
September 01 (Ziltawpni) MULOU A GINGTU
🙏🙏 Tuachi’n Jesu’n Thomas kung ah, “Na khut me in hing tham inlen na khut te en in. Na khut in ka nah tham in len sawh in. Ginglel nawn sin len, gingta ta in”, achi hi. Thomas in a dawng a a kung ah, “Ka Mangpa leh ka Pasian aw” achi hi. Jesu’n a kung ah, “Thomas nang kei na hing mu zieh in na gingta ahi, mulou a gingta te a hampha uhi”, achi hi (Joh. 20:27-29).
A thawkia zou a nuazuite kung a Jesu a kilah lai in nuazui T homas khu a lah uah a pangkha sih hi, Jesu thawkia thu a gintat lou zieh zong ahi maithei hi. A nua lam in Thomas a um lai ngei in ava kilah kia a, tuachi’n a gingta thei ta a, mulou a gingta te hampha ahidan uh Jesu’n agen pieh ta hi. Tuni hun a i gingtu hinkhuo uah, mi zousie mu thei ding in Jesu a kilah vateh sih a, Thomas bang a mit a mu tei tei i sawm lou ding ua hoi ahi. Bible a a thu i mu leh i sim a ingaikhieh te ban a Pasian mizah te thugen a pat ginna a isan mai ding ahi. Tuaziehin, a poimaw hun a hangsan zong a poimaw na dan ana um zel hi. Thomas bang a chiemtena phut sese lou in, mulou a gingtu hi sawm va ui.🙏🙏👏