THILPHALO BAWL IN TI AH KIZILTIL A PHAZAW MAI DIAM
– KL Muana Khaute
Mi zosia’n ziltilna a piak nawp leh a kidawisakna thu I gen uh leh I genpen uh chu thilpha bawl hi chimchaklo di ti leh kuama tawh kisiatlo a kiho thei a chenkhawp dial dial dial a, taksa leh thagau ah kituak tak ah lim leh kipak a nuikhawp dial dial ding ahi ti hih ahi.
Amasapen ah nu leh pan kilungsiat leh kituak tak ah sepkhawp, nekhawp, nuikhawp leh hinkhua chawmcha hi lim leh kipak, chantawk ah lungawi a siamtu lunglam hawl a, cha leh nau, khawtang, gamsung kitanggual ah damsung matkhawp di hih ahi. Himaleh, lim leh kipak tak ah hinkhua mat sang in kituaklona leh buaina’n a tangpi’n ei thunun leh ei takbuak maisek hi kua I ngaw ta diam; setan ngaw di maw ahiloleh eima ego- lungthim I kisum zawlo hi ngaw di I hiu em, ahiloleh siamtu Pathian ti hi ngaidan a um thei hi.
Kei ka ngai ngaidan in, setan ahiloleh Pathian ngawdan di lampi kahe zo pua, eima mimal lungthim du-amna hi kingaw leh a dikthei pen dia aw kati chang a tam hi. Aziak ahileh setan leh Pathian chu eima mimal kiang ah hung kilang in zia gual ahin la um di ahiloleh ziagual ahin la bawl di ahun ti lam la he kha diam? Ken vang ziagual ah thuhilna chu ka dawng kha puai. Ahinla, thilpha bawl leh mite kipakna ding ka bawl le kahe diak puai. Zia thu hi ngaitua khamting leh dawnhuna pia ding ah kingaitua chu pawimaw ma ma in ka hiai.
THILPHALO bawl ding ah zilsak tu le nei diaklo a mimal, insung, khawtang leh gamsung ah lemna, kituakna leh lungawina um thei diaklo ahichun Eden natna chu I ngaw di pen chu ahung suak ta. Zia Eden natna- hivei chu ngaw taleu hin Kalvari cross ah Pathian chapa Jesu’n khawvel thiamlona zosia a tatna leh mihing lak apat a thawkitna leh mithiang lakkhawmna hung nei di ahi ti thu hi taksan di maw ahiloleh, Khrista tatna na chu bangmalo ah ngai di I hiu em le! Hilo in ei ama chu Pathian chapa ahin a thutep achun a zuau thei ngai pawngal ah.
Siamtilbu ah I mu gual ah nekding pha, tui leh bawl ding a thilpha bawl ding kilawm tamtak a um lai a, bawllo di leh neklo di pakhat sun sun vak bawl a, khawvel pumpi giltlona leh sualna dim ziang bawl khel khel nawpna hi khawvel thunun pen ahileh cha leh nau, nu leh pan, insung, gamsung leh khawvel pumpi hingmi zosia leh thilsiam zosia hi thilphalo bawl ding in ki ziltil leu hin khawvel ah khantona leh lemna a bukim pen mai diam ti hi ngaituana’n a hung lang ta sek hi. Ahinla, vacha thang-awk thasuak a achukna ti hetalo ah mawk len len le a thilaw hi atiu chu kibang kitngen intin lungkham a um tai.
Khawvel mimal nawp dan chiat ah mat di ti Sodom leh Gomora gual zalenna mangkit ta leng zia chu kumsawt a dai puai, mei le kat in halmang in a um a, khawvel mun chuam Pathian hepilo khawpi te chu mitphet kal in thai-mang in a um kit ngen sek a. Khawvel mipil tamtakte’n Pathian a um puai atiu leh le lah chawmlo kal in pakcha gual in NITUM ma’n a tuai muat mai ta sek a. Ei gingtu pawl khenkhat in kochuam zalenna thanghuai tak in a hung pan sek ua, hun chawmkhat sung chu kilawm leh nuam tak in Pathian mi lam in a limpi sek un, ziate chule tuhin a mang thai zo tau. Zia gual zawng achun Dr. Rajnesh ngei inle kochuam zi leh cha, pasal chuam umlo kochuam chu ahun siam ngei ah, zia chule tuhin hiat leh mu ding a um kit ta puai.
Khrista kochuam suangpi chung ah kiphu chu a dik in, a thiangtho pen ta. Amabo, abkal ah puitu gin-umlo Khrista a hina nei leh nungzui kel hawm khenkhatte ziak in kochuam thiangtho- Pathian mi dikte chu suk melhem in a um sek a. Zia thagau buak apat kiveng hi chiat ah khawvel nam tinte kiang ah tang thupha puaksuak ding in Lalpa thagau chun ei pui zel ta hen.
Kochuam khenkhatte hi pharisai deutak mai ah khristian hi ngal, ginglotute um dan, nek dan, tawi dan, piak dan ahi a kilawm dan thiangtho ma ma kilang, damlai leh hatlai nawp dan dan ah um a, thini phat leh pastor te’n vangam tung di tei tei ding ah thadawk le a kitam hi. Zia chungthu ahin mihiam in thuneina kineilo ahi ti hi hezing a gingtu I hingal ahileh Pa kiang tung ding ah ginna leh nasep nei ding in I kigel thak uh ngai ma ma di ahi. Hun a um petcha hin Lalpa dawilam leh lungtungna tiang ah kilan ding ah dawitak leh ngaina tak in I kichial in kilan chiat hitiu, Amen.
