✍️ Sanchong Mangkholen Haokip (freelance writer) | TULAI-HUILHI
Tulaija boina mun hohi meilhei toh kigamgi (border) ho bouseh ahi. Vangphat umtah in, Thinglhang gam atamjo atongkhapoi. Hijehchun, loulho-thingpoh (agriculture & horticulture sector) lampang ihabollou uleh kel hunglhading ahi. Bible seidungjuijin, malaijn Egypt gamsunga kum-7 kel analhai. Kel alhahdingkon chun Joseph in kel-douna dinga kigotna lhingset aneidan thusim imutauve. Chuleh, Juda gamsunga kel alhahkit jeh in, Ruth leh amoutenin Moab gam anajontauve kiti thusim jong Bible a isimdohkit tauve. Kellhah kitihi sapaova femine akiti. Hiche “femine” hi kichat tijat umtah ahi. Gal le tol jeh a, kel hunglha teitei ding ahi. Ikidoupiu meilhei ho jong akikhoto pantauve. Masangjepma Somalia gamsunga kel-lhah gimneitah thusoh jong isimdohkit tauve. Eihojong tua patna kigotna lhingset ineilou uleh, imasanguva vaichatna leh kel-lhahnan nitinnin eigaldot pantauve.
Hijehchun,
Chin-Kuki-Mizo-Zomi-Hmar chaten jong kel-gal satnadinga kigotna ineipandiu angaitai. Meilhei gal isat uhi imacha ahipoi. Kel galsat kalvalla hahsa ding leiset chunga umlou ahi.
Government leh NGO supply noija itihchanpi iki depend diuham? Nalhohbu mangchan lang, 5-minutes beh gah gel thuhjep lechun, mingolpen injong ahunglhungding neokhatbeh amuphah ding ahi. Tutua sumsanna Government service neokhat naneiman a lungkhamlou danna um nahim? Government servant ho tahtah chun kel-gal ahindoulal diu ahi. Imphal tolpi sunga hinkhonomtah kimangho chu hungkile kit dinga kinepna nanei nahlaijem? Never
Vaichat galsatna dinga lampi umsun ho
👇 Abonna najo joulou ding jongleh khatpenpen kilhennin👇
1). Phailei neilouhon thinglhang changpal lei lentah bolteitei angaije. Phailei neihon double-cropping habol angaije. Kumkhatsunga nivei chang-at ding tina ahi. Insonna twichopdohna tulu neicheh ding ahi. Nichang asat jongleh phailei chu boisahlouding ahi. Van gotwija ki depend gunset ho alosam nomjie. (Sumlepai hahsa jongleh, nehlechah aninglhin pouleh, upai khat umphot ji ahitai)
2). Thing (ginger) leh turmeric (ai-eng) farm habolding ahi. (Ajohnading lungkham hih in)
3). Kel lapding Kolbu or kolbuman lei bolteitei ding ahi.
4). Malchapom (king chilli) lei habol angaije.
5). Nachenna gamleiset toh kitoh, johthei anche-louhing (Bepal, betou, kohpi, bal, mai, donkho, changmai, bekan, ahlu, pathikhom) kitiho habolla bolding ahi.
6). Gancha-vah (animal husbandry) lampang Ahcha, vohcha, uicha, vatot, kelcha, Siel, bong le loi havahding ahi. Amin maimaija khat le ni bouseh vahding ahipoi. Ahitheileh gimpikhamset, haopi khamset dinga boipiding ahi.
7). Shi lei habolding ahi. Chuleh ankamthao mutheina dinga ankam lei lentah bolding ahi
8). Pa (mushroom) semdan leh khoivahdan (bee-keeping) training chaisa hon aheloulaiho hilding, boljong bolteitei angaije. (Hiche vanghi haona ahipon, kimanchahna kham sumlepai mujingtheina khat ahi)
9). Sumkolveina thengsel ho habolding, kani kanja kitiho vang nungsun ding ahitai. Mijousen kibolthei ngallou, daan injong aphalkit lou, minset umnabep ahi. Meilhei hon narco-terrorist eitiuvin, eiho la kihiloubeh, nuijat umtah ahi. Ipichu hitaleh, khamnathei narcotic toh kisamkai Kani-Kanja chu nungsun phot jengtaute. Narcotic lampang business hi gangtah a kihao dohthei, gangchella kivaicha kit thei, ahijeh in long-term livelihood ahipon, kineppitheijong ahipoi. Kani lei bol hi a support loitah kanahi. Kani jalla eiho economy hi nasatah a, hungkhangtou chu ahinai. Hijongleh, nampin “aphapoi” tia akha chahkheh khat bol teitei ding chu angaina ahikitpoi.
10). Khutthem-thilthem (handicraft), chuleh ponkhon (handloom), carpentry works, kitihohi jilding, athem hon athemmo ho hilsonding, habolla bolding ahi. Saipikhup leh ponve mantam ho hakhonding ahi. Pon mantam khonjeh a, inchen kisemdoh tampi aumtai.
11). Kengkoh khui, samche, ponsop, laundry kitiho honding, jachatna neilouding, chuleh sumtheng munathei ahipouleh, sumkolveina neochacha (petty business) hojong habolding ahi.
12). Gamleiset phatea manchahding, asunga um natural products ho phatchompi ding ahi
13). Horticulture lampang jong hakhohsah angaije. Kum 5 jouleh chollouva, summuna thei long-term plan hochu mot lei, champra-komla lei, apple lei, kolbuthei lei, grape lei, lengthei lei, kiwi lei, jonglha lei, kitiho jong hi kel-galsatna dinga lampi umsun khat chu ahikitne.
14). Ahitheileh PMEGP loan ho jong hi lahthei ahi. Hiche hi Khadi & Village Industries vetsuina noija kibol ahi. Ahinadingdoltah a bol ho, a-inchengdoh tampi aume. Achomlam a Bank loan tiding ahi. Ahinlah, hiche process hi abaotam thim in, selection munadinga aboltheikhat kibolsah ding dan ahi. Selection Board hojong lunglhai angaijin, Bank Manager jong lunglhai kit angaije. Hiche project hi corruption neokhat alutjeh in, koimapouvin vang amujipoi.
👆🏿Tunnin kilhen inlang, nangma boltheina pen khat ulsalong pum in bulsuhjeng lechun, Pathen in nakithopi ding, vaichat-gal nasatjouding ahitai.
Ahinlah, akiboljouse hi anom khatcha aumpoi. Thohhat angaije. Anatohna jousea chimbai, thase bai, lunglha bai, thoh-hat lou mi ho alolhing ngaipoi.
Meilhei ho jong thinglhangmi eihojalla kivah hing thei ahiuve, tua patna amahojong hung gentheipan diu ahitai. Eihon amahohi economy, technology & education lampanga iphajoupouve. Hijongleh, pontho le gunchu tah a, ikihambol tenguleh delphahthei khokhelthei ahi. Ajehchu, eihon thinglhang gam lentah ineijun, amahon gamleiset neocha bou aneijui. Amahokhu 700 square miles kahsunga tehchetna cheng ahitauve. Farm bolnading jong aneipouve. Mihao atamthou vanguva, migenthei (eiho sanga vaicha jo) dimset kit ahi. Amaho lah a, kingailutna khankho-nunkho aumpoi. Ngari, chilhum malcha jeng jong kithumto lou, kipeto lou ahiuve. A-insahpa a-inlhangpan gilkel-dangchah thohjongleh kimumosah dapveh te ahiuve. Pannabeija amaho kilungtona pen chu mivoh ahi. Mikhatchun suhkhel neokhat ahinneikhahleh, asuh-asah umlouva kithom uva, avoh jengu ahi. Tua gal hungkon khom ji ho jonghi akingailu-akilungset ahidehpouve. Lungletna dinga khamnathei louchang leh ju kitiho ahinbol mengpheljiuva hungvaikonjiu ahi. Alunggel utoh abahlouphat uvin, amahojong kehni akiso tauve. Chamna deiloi, galbolkit ding deiloi, Biren deiloi, adeimoloi adimset tauve.
Amaho dinmun hi eihon chance lahnan nei uhitin, inchen-khosah sumlepai-nehlechah (economy) lampang khantousahna dingin agriculture & horticulture lamtoh kisai farming habol uhite.
Nidang-lhadang Kumdang noplai hinkho pailhautin, hahsat nikho (kel le chah) kimaitopi dingin kigotna lhingset neipantaute. Thaset kitivanghi pailhah masat angaije. Ajehchu Thaset leh vaichat kitihi sopikhat apengkop (twins) tobang ahi.
Meilhei ho jong genthei panta
Meilhei hon thinglhanga patna thinglego alahtheilou phatnin, phaicham a brick-field atamjo akitungthop tai. Anche-louhing (vegetables) hojong alhasam lhehtai. Business bol, inn-sa (mistry-jugali), labourers honjong adehpang akisotpan tauve. Dukan atamvangin thilcho ding mi alhomtai. Private company ho jong atamjo athi pantai. Thinglhangmiho beija hingtheilou ahiuve. Tuchung kidouna hin, amaho kilolvahna (livelihood) ahatohkhah joh jeh in akhoisa pan tauve. Bricks and cement factory ho jong atamjo mangthah ding koncha ahikit tai. Amaho economy jong hungkemsuh ding, hunglhasam ding ahiphatnin lunggeltheidom miching ho alungkham pan tauve. State khat sunga chengkhom khat kidou kitichu alang-alanga economy alhahsamding chu seilouva hetsa-musa ahi.
Eihonjong “thinglhang gam nomtah kaneinai” tia mohlungmon jeng ding ahipoi. Agamleiset resources ho manchahje ithep lou uleh, vaichat-gal isat jouloudiu ahi. Inn hoitah, inn nomtah sunga cheng inlang, smart tah in umjonglechun, vaichat-gal nasatjoulou tengleh, vandah ngamlouva kaikuden ding nahitai
