ZALENNA MAT KHIALNA GAM SANG IN HAUSA THUNEINA HI AZA UM ZAWI
– KL Muana Khaute
Khawvel gam a tamzaw hi democracy kivaihawmna mangcha kivaipua chu ahi. Ahinla, dan leh dun hi a gam leh gua tawh kisiam ahiban in khenkhat chu democracy dik tak hilo, a kithuapi vuat ah kisiam hi in ka mui. Ahin ziate chu bukim tak ah genkim zaw le hi puan tin, I hiatna’n le bankim zo puan a. Tuchung thuvawn ahin Indian democracy nuai ah a biktak ah I chenna Manipur hi gen deu ding I hiu.
Democracy state a cheng, khawsa leh democracy thuthung siamsa kivaihawm chu I hiu. Ahinla, thuneitute kisan leh party-te ideology zil in vaihawm dan leh thunei dan a kibang puai. Kum nga dan in election a um sek a, Governor, Chief Minister, Minister a party hat leh zawn zil in a hung kisang tua sek hi. Zia ziak deu chu ahi diam democracy gam leh vaihawm dan leh thunei dan a hung lamdang sek ah, democracy tak ah kivaihawmna hile Communist, Dictatorship or one man government a hung batchang a hung um sek hi. Thiangtho tak ah vaihawmna iti diam ahiloleh government service di lak phat leh free and fair sang in corruption tam deu hiat thei in a um sek ahi. Department zosia I en vel ah quality leh qualify lo mu ding a tam ma ma hi.
I gamsung ah lekha thiam tamtak government a sepna muzolo a singah a um lai in, a thiam phalo government service sem mu ding a tam ma ma hi. Zia hi imit ah imu bep hilo in, zillaite kiholimna, lekha zil in thiam leng le a chawkna di sum I neilo chun, mipa ngai gualtho kihitho di ahi ti hih a kihiamun pawl khat chu ahi. Ahilo tawp ah, election ah service ei piathei di pen pen thingam zui di ti hih ahi. Chutichu ahitak chun democracy tak ah free and fair ah kivaihawmna chu umlo a hi nalai diam ka ti chang a tam hi.
Khawtang holimna bil I daw vel ah, recruitment thu mipi-palai leh top officials te quota a nei chiat uh leh chu minautang a ding achun thiam chungchuang lote a ding in kinepna chu a thawn mai ahisek hi. Ziakachun, mi lunggel theite chu farm bawl ahem, business bawl mailo chu kinepna dang a um ta puai. Chuleh, nikhawtha kilaw, lo-bawl leh gukchak mailo chu inkuan kivakna ding um talo ahimai hi.
Tulai tak ah thiamzilna ah thiangtho pen chu games and sports ahi deu mai tai. Zia hi chu thiamna leh hatna mipi zosia’n imit a imu thei pen free and fair pen ah ngai chu ahimai ta ahi. Ziaziak achun, democracy vaihawmna nuai ah um I hingal ahileh a thiam a chingte khawvel leh sakhua vaihawmtu’n pang taleu I gam hi masawn in chamna leh muanna, khantona le hung um ngei di ahi.
Khawvel vaihawmtute’n diklo tak leh khenchuam nei ah vai ahawm sang un khuasung hausa mawlpen vaihawmna a diklote salam sat sak ah kilemna ala bawl sek uhin khantona leh lemna a um zaw diam ti chang ka nei hi. Khaile, government vaihawmtute leh khuasung hausa vaihawmte hin diktatna tawh democracy gam ah cheng I hiu a, ahi di gualtak in vaihawm leu hin mi vantang inle government hun taksang intin, election taklehle sum leh pai sentam ngailo in mipi-palai ding chu kitel in I gam leh nam le khangto in, kimuanna leh kilungsiatna’n vai hun hawm ding ahi. Chuleh, khawvel ah lemna leh khantona hung um intin, a zawng a hau kitanggual in siamtu chu pak in chawihawi kim chiat thei tai tiu ti chu ngaituana a um vawng vawng hi.
